chapter 5
Keren apol, sar kamle shavora, le Devleski parabola,
haj trajin ando kamipe, sar vi o Kristo kamelas amen, haj kothe das pes dimataske, lashe sungasle sarkafimoske le Devleske.
Marhipe haj zhisosko biuzhipe bake xanzhvalipe chi ande vorba tena avel mashkar tumende, sar kado perelpe kaj le suntura,
chi zhungalipe bake chi dili dujagorutni vorba, so chi perelpe, barem najisipe.
Hatyarenla aba, haj xutyilenla opre, ke chi soske marhimaske bake biuzheske, haj xanzhvaleske, bake fetishos kamles najles rig ande Kristosko haj Devlesko them.
Khonyik tena xoxavel tumen shushe vorbenca, ke anda kasave marel le Devleski xolyi le bipatyamnimaske shaven.
Na aven apol rigasle ande lenge bezexa.
Ke varikana tunyarikipe sanasle, ba akanak fimlalipe sanle ando Raj. Trajin kade, sar le fimlalimaske shavora,
– le fimlalimasko frukto pale sa lashipej, chachimataj haj chachipej –,
roden kodo, so le Rajes faj.
Na aven rigasle ande tunyarimaske trabi, barem phenen tele kodalen.
Ke so von tajnicka keren, inke vi avri te phenen lazhavo si.
Ba pe sakofalo, so telephenipe resel, fimlalipe puterdyola,
haj sakofalo, so avri zhanardyol, fimlalipe kerdyol. Kathar si o phenipe: „Ushtyi opre sovjindo, trajisar opre anda tyo meripe, haj o Kristo pe tute ablyola!”
Apol zurales len sama, ke sar trajin, na kade sar le bi godyakire,
ba sar le platnika. Mishto trajin opre e vrama, ke chorre dyesa trajisaras!
Na aven apol dile, ba hatyaren, ke soj le Rajesko kamipe!
Na matyon tele kathar e mol, ke anda kodo marhipe kerdyol, barem pherdyon Suntone Duhosa!
Mashkar tumende salmi, haj sunci haj duhikane gilya gilyaben, gilyaben haj volyin tumen le Rajeske!
Den najisipe anda sakofaloste amare Raj Jezush Kristosko anav le Devleske le Dadeske!
Muken tumen jekhavreske ande Kristoski dar!
Le romnya te muken pen penge romenge, zhisar le Rajeske,
ke o mursh sheroj la romnyake, sar vi o kristo sheroj la eklezhiake: voj si le truposko muntori.
Ba sar e eklezhia le Kristoske si telalutni, kade vi e romnyi ande sakofaloste peske romeske.
Tume romale, kamen tumare romnyan, sar vi o Kristo kamelas la eklezhia! Pes das anda late,
ke ande pajesko najaripe perdal pa alav uzharindes te suntosarella,
haj luvudyimaske te shol peske la eklezhia, ke chi sosko nasul somno tena avel pe late, ba te avel sunto haj uzhi.
Zhikade vi le mursh kade te kamen penge romnyan, sar penge trupos. Ke kon kamel peska romnya, pes kamel.
Ke chikana, khonyik chi rucil pesko trupo, ba xaxavelles haj grizholles, zhikade sar o Kristo la eklezhia,
ke riga sam leske truposke.
„Anda kado o manush mukel peske dades haj deja, kaj peski romnyi cirdelpe, haj dujzhene jekh trupo kerdyona”.
Bari tajnaj kadi: me pale pa Kristo haj pa eklezhia phenav kado!
Apolal savorazhene mashkar tumende kade te kamel peska romnya, sar pes, e romnyi pale te patyivisarel peske romes.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly