chapter 6
Shavorale, muken tumen tumare dadeske haj dejake ando Raj, ke kade si kodo mishto.
„Patyivisar tye dades haj tya deja”: kadi si e angluni vorba dinipesa kethane phanglo vladipe:
„ke lashi butyi te avel tut, haj lungone trajesko te aves pe phuv”.
Haj tume dadale, na xolyaren opre tumare shavoren, ba bararen len opre ande pacha haj ande Rajesko feripe!
Slugonale, muken tumen kathar trupo inkerdine rajenge darasa haj izdravjimatasa ande tumaro ilo ande jekhimata, zhikade sar le Kristoske!
Na po dichipe slugisaren, sar le manushengo fajlipe te rodenas, ba sar le Kristoske slugi, kon anda ilo keren le Devlesko kamipe!
Muklikane kamipesa slugisaren, sar le Rajeske te kerenasles, haj na le manushenge!
Zhanen, ke sakon, kon variso lasho kerel, kodo lela pesko potyinipe kathar o Raj, shaj avel sluga bake slobodo.
Tume pale rajale, zhikado te keren lenca, muken le kushlimata, ke zhanen, ke vi tumenge haj vi lenge Raj si ando cheri, haj leste naj alosaripe.
Palunes apol: Zurardyon ando Raj haj ande leski bari zor!
Len opre le Devlesko mudvaripe, ke te zhanen te tordyaren le bengeske intriki!
Ke na le ratesa haj le truposa trubuj te marasame, ba le rajenca, le barenca, le tunyarikimaske anglalarenca, le nasulimaske ando cheresko uchipe beshle duhonca.
Len opre apol le Devlesko mudvaripe, ke zurale te aven po nasul dyes, haj te shaj tordyon, ke sakofalo kerdine.
Kade tordyon apol, ke tumaro mashkar brichinarisaren opre chachipesa, haj len opre pe tumende le chachardyimaske sastrune gada!
Tumare punrenge sandala te aven la pachake evangeliumoske viacarimasko muklipe!
Zhikaj kado len le patyapeski dhala, savesa shaj mudaren le nasulimaske sakono jagasle sulici.
Len opre le muntoimasko sirastrumo haj vi le Duhosko xanro, apol le Devlesko alav.
Sagda rudyin ando Duho, ande sakono rudyipe, haj ande leste ratyaren sagutne zurardyipesa rudyindes anda sagutne suntura,
haj vi anda mande, ke o Del te del man vorbi, kana avri putrav muro muj, ke tromanes te viacarav le evangeliumoski tajna,
saveske legatari som vi ande sastra: muk te vorbisarav tromanes, sar kado vi trubuj te kerav me.
Ke vi tume avri te zhanen, ke so si manca, so kerav, o Tichikus, o kamado phral haj patyivalo sluga ando Raj, sakofalo phenela tumenge.
Zhianda kodo bishaldom les tumende, ke avri te zhanen, ke so si amenca, haj te ushorisarel tumaro ilo.
Pachipe le phralenge, haj patyapesa angalyi dino kamipe kathar o Dadunodel haj kathar o Raj Jezush Kristo!
Gracija sa kodalenge, kon na nachilimaske kamipesa kamen amare Rajes, le Jezush Kristos!
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly