Lil le efezushenge

Chapters:

1 2 3 4 5 6

verse #1

Vi tumen opretrajardas, kon mule sanasle anda tumare bezexa,

verse #2

ande soste trajinas varikana ande kadi luma, haj mukenas tumen kodale rajeske, kodale duhoske, kon akanak ande bipatyamnimaske shave trajil.

verse #3

Varikana vi ame savorazhene mashkar kadal trajisarasas, kana kodal kerasas, so amaro trupo dorolas, haj kodal kerasas, so o trupo haj le hatyarimata mangenas. Sar arakhadyilam la xolyake shave samas, sar vi le majbut.

verse #4

Ba o Del, kon barvaloj ando lashipe, haj baroj anda pesko kamipe, sosa kamelas amen,

verse #5

ba chaches anda amare bezexa mule samas, le Kristosa kethanes opretrajardas amen – anda leski gracija muntusardyiline –,

verse #6

Lesa kethanes opretrajardas haj mashkar le chereske vazdas amen perdal pa Jezush Kristo,

verse #7

ke te sikavel ande avlimaske vrami peske gracijimasko barvalipe amenge ando Kristo Jezush.

verse #8

Ke anda gracija muntusardyiline perdal pa patyape. Kado na tumerndar si, ba le Devlesko tofnipej:

verse #9

na kathar kerdyimata, ke khonyik tena asharel pes.

verse #10

Ke leske kerdyimata sam, ando Kristo Jezush pe lashimata kerdosarde, saven o Del anglal kerdas, ke ande lende te trajisaras.

verse #11

Inkren apol ande tumari godyi, ke varikana murtikana sanasle, kathar o trupo inkerdines, haj bi krujalshindeske phenenas tumen kodal, kon po trupo vastesa kerdosardo krujalshinipe line pengo anav.

verse #12

Ande kodal vrami inke bi Kristosko trajinas, streni sanasle kathar le Izraelesko kethanipe, avral tordyonas pa paratnimataki konvencia, bi sperantako haj bi Devlesko trajinas pe kadi luma.

verse #13

Ba akanak apol ando Jezush Kristo tume, kon varikana dur sanasle, pashe resline perdal pa Kristosko rat.

verse #14

Ke voj si amari pacha, kon le duje popularon jekheske kerdas, haj kodo alosardo zido so mashkar amende si, ande peste tele puterdas.

verse #15

Le alosarde vladimaticka krisa koslas, ke sar pacha kerdari, le dujen jekhe nyeve manusheske te kerel ande peste,

verse #16

haj soldujen ando jekh trupo te ushorisarel le Devlesa perdal pa trushulesko kasht, mudardines o dushmanipe ande peste.

verse #17

Avilastar, ke pacha te viacarel tumenge, kon durutne sanasle, haj pacha kon pashe sanle:

verse #18

ke perdal pa leste si soldujen slobodo drom ande jekh duho kaj o Dad.

verse #19

Kade apol abakanak chi sanle streni haj avlimara, ba le suntonge amala haj le Devleske khereske manusha,

verse #20

pe aposhtolenge haj profetango fundo shutino kher, savesko kolcosko barr o Kristo Jezush si.

verse #21

Ande leste pashardyol kethane o intrego kher, haj le Rajeske sunto khangerake barola.

verse #22

Vi tume ande leste pashardyon kethane le Devleske khereske ando duho.

Chapters:

1 2 3 4 5 6