Judashesko lil

1. vers

O Judash, le Jezush Kristoski sluga haj le Jakabesko phral, kodalenge, kas o Dadunodel kamel, le Jezush Kristoske inkrerdasles haj akhardasles.

2. vers

Jertipe, pacha haj kamipe butarindes te davadyol tumenge!

3. vers

Mure kamade, apol ke uzhoj muro kamipe, ke pa amaro muntosaripe te iskirisarav tumenge, kade gindisardom, ke trubuj ande kado lil te mangav tumen, ke te maren tume anda patyape, so jekhar haj sagutnes perdal dine le suntonge.

4. vers

Ke chordanes andre aviline mashkar amende unyi manusha, kon aba dulmut avri si alosardine po krisaripe. Bidevleskirej, kon amare Devleski gracija pe penge hatyarimaske trabi bolden, haj le korkoro rajisardes, amare Rajes, le Jezush Kristos asvikaren.

5. vers

Duma kamav te dav tumenge – apol sa kado mishto zhanen –, ke o Raj, pala soste avriskepisardas peske popularos pa Edyiptomeski phuv, majpalal kodalen, kon chi patyanas, mudardas.

6. vers

Le andyelon pale, kon chi inkerdine pengo patyivipe, ba mukline pengo than, pe bare- dyesesko krisaripe pe sagutne sastra, ande tunyarikipe inkrel.

7. vers

Zhikade vi e Sodoma haj Gomora, haj le pashutne forura, save marhimasle sas, haj pala kaver trupo phirenas, dukhardine la sagutna jagako sazdelipe, haj daramnimaske somnoske tordyonas angla amende.

8. vers

Vi kadal khanchi gindimaske, zhikade nasvaren le trupos, le opralutnipes tele dikhen, le luvudyimaskiren pale kushen.

9. vers

Ba o Mihaly anglalutno andyelo, kana le bengesa xalaspe haj marelaspe anda Mozeshesko trupo, chi tromalas kushlimasko krisipe te phenel pe leste, ba kodo phendas: „Te sazdelisarel tut o Raj!”

10. vers

Kadal pale tele marhisaren sa kodo, so chi hatyaren. Ba so kathar e luma zhanen, sar le chalade pedura, perdal pa kodo ando rumuvjipe resen.

11. vers

Jaj lenge, ke pe Kainesko drom phiren, haj le Balamesko bi zhanipe, pa barvalipe traden pen, haj sar o Koroe ando maripe, xasajvenatar.

12. vers

Lazhamnimataj kadal pe tumare xamura, bi palpale inkerdines xan, haj pen thuljaren: bi brishindeske nororaj, saven le balvala kathe-kothe nashaven, tomnake, bi sumburoske, duvar avrixasajline, kathar e rikita avri- shindyilne kasht si,

13. vers

turbato marake plemeni si, save penge marhimaske spuma maren, pelimaske cherhajaj, pe savende le tunyarikimasko tufano zhukarel sagutnes.

14. vers

Pa kadal profecisardas o Henok, pala o Adam o eftato, kana kade das duma: „Aketa avel o Raj peske mija suntonca,

15. vers

pe sakofaloste krisaripe inkrel, haj sazdelisarel sakono bidevleskires anda skono nasulipe, so nasules pecisardine: haj anda sakono azbaimaski vorba, so le bi devleskire bezexasle pe leste phendine.”

16. vers

Furcimaske bi pachakej kadala, kon pe penge doromaske drom phiren: lengo muj phutyaripe vorbil, haj anda xanzhvalimata shon o lasho le manushenge.

17. vers

Ba tume, mure kamade, serosardyon pa alava, so anglalutnes phendine amare Rajoske, le Jezush Kristoske aposhtolura.

18. vers

Phendine tumenge, ke „ande palune dyesa prassavjimaske avna, kon pe penge doromaske drom phiren, ando bidevlipe.”

19. vers

Kadal kodal si, kon alosardyontar, hatyarimaskej, biduhoske si von.

20. vers

Ba tume, mure kamade, vazdadyon opre pe tumaro majsunto patyape, rudyisaren ando Sunto Duho,

21. vers

inkren tumen ande Devlesko kamipe, haj zhukaren amare Rajosko le Jezush Kristosko jertipe po sagutno trajo!

22. vers

Kadalen krisaren haj sadelisarentar:

23. vers

kukolen pale muntosaren, haj len len avri anda jag! Pe majbutzhene pale jertisardyon dramnimasa! Inke vi kodal gada rucin, so bezexaslo phiradas!

24. vers

Kodales pale, kas siles saktimo, bibezexesko te inkrel tumen, haj kana aveltar amaro Raj Jezush Kristo te tordyarel amen angla pesko luvudyipe uzhes haj anandimaske losshasa,

25. vers

amare korkoro muntori Devleske, perdal pa amaro Raj Jezush Kristo, te avel luvudyipe haj asharipe, rajisaripe haj saktimo angla sako vrama, akanak haj saguno-sagutnes! Amen.

Fejezetek:

1