chapter 3
Anda kado apol, opre te trajisarardyiline le Kristosa, roden le opralutnen, kaj o Kristo si, pe le Devleski chachi rig beshindos.
Le opralutne butyanca grizhon tumen, na le phuvakirenca.
Ke muline, haj tumaro trajo le Kristosa garadoj ando Del.
Kana pale o Kristo, tumaro trajo, sikadyola, atunchi vi tume sikadyona lesa kethanes ando luvudyipe.
Mudaren avri apol anda tumare riga kodo, so phuvakoj: o marhipe, o biuzhipe, o frivolipe, o nasul dorope haj o xanzhvalipe, so naj kaver, sar le fetishosko kamipe.
Anda lende resardyolatar le Devleski xolyi pe le bi patyamnipeske shave.
Vi tume kadal kerenas varikana, kana mashkar lende trajinas.
Ba akanak aba shuden tumendar sa kadal: e xolyi, o nasul kamipe, anda tumaro muj e kushlimata haj e zhungalyi vorba.
Na xoxaven jekhavreske, tume, kon tele shudine le dulmutane manshes peske kerdyimatanca kethanes,
haj pe tumende line le nyeves, kon pe peske kerdareski mosura sagda nyevjardyol zhipo intrego pinzharipe.
Kathe naj aba majbut helleno haj bi boldo, naj krujalshinipe haj bi krujalshinipe, naj barbaro, skita, sluga haj slobodo, ba sakofalo haj ande sakofaloste o Kristo.
Len apol pe tumende, sar le Devleske sunci haj skunpura alosarde le lashipesko hatyaripe, o blindope haj o pachipe!
Trajin pasha jekhavreste, haj jertisaren jekhavreske, kana varikon dosharel le kaveres! Sar o Raj jertisardas tumenge, keren kade vi tume!
Haj sa opralutnes pale: len pe tumende o kamipe, so le federipesko phanglipe si!
Haj le Kristoski pacha, pe soste akharipe line andekh trupo, te rajilpe ande tumaro ilo! Aven najisarde!
Le Kristosko alav te beshel ande tumende barvales! Sakone platnikipesa sityaren haj ferisaren jekhavres! Najisipesa ande tumaro ilo gilyaben le Devleke salmi, sunci gilyaba!
Zhiso keren, vorbasa bake kerdyipesa, sakofalo ande Raj Jezushesko anav keren, haj phenen najisipe le Dadunedevleske perdal pa leste!
Romnyale, muken tumen tumare romenge, sar perelpe ando Raj!
Murshale, kamen tumare romnyan, haj na aven capeni karing lende!
Shavorale keren kodo sagda tumare dadenge haj dejange so phenen, ke kado skunpoj le Devleske!
Dadale na vazden xolyi ande tumare shavora, ke tena xasaren pengi volya!
Slugi, muken tumen ande sakofaloste kathar tumaro trupo inkerdine rajenge, ba na po dichipe slugisaren, sar le manushengi voja te rodenas, ba vorta ilesa ande Rajeski dar!
Zhiso te keren, anda ilo kerenles, sar le Rajeske, haj na le manusheske te kerenasles!
Ke zhanen, ke kathar o Raj lena tumaro potyinipe. Le Raj Kristoske slugisaren;
ke kon bi chachipe kerel, palpale lel kodo, so bi chachikanes kerdas: ande kado naj avrialosaripe.