chapter 4
Anda kado apol mure kamade phral, muri lossh haj korona, kade inkren avri ando Raj, mure kamade!
La Evodia zurales mangav, haj vi le Sintiches, ke te hatyaren jekh ando Raj.
Vi tut opre mangav muro butyako chacho amal, av pe kodalengo zhutipe, kon manca kethanes butyaren anda evangeliumo, le Kelemenesa haj mure majbute amalenca, kaske anava andrej ande trajoski hertija.
Losshan ando Raj sagda! Pale phenav: Losshan!
Te pinzharel sakon tumaro blindope! O Raj pashe si!
Na aven ande khancheste daramne, ba sagda ande rudyimata phenen tumare mangaimata le Devleske!
Le Devleski pacha pale, so majbari si kathar sako hatyaripe, asharela tumaro ilo haj godyi ando Kristo Jezush.
Kaver falos pale phralale, pe kodo te phirel tumari godyi, so chachoj, so patyivaloj, so chachimaskoj, so uzhoj, so kamimaskoj, so asharimaskoj, haj so harnyikimaskoj.
So sityiline haj patyajline, so ashundine haj dikhline mandar: kodo keren: haj tumenca avla o pachimasko Del.
Chachikanes losshajlom ando raj, ke pale kasave zurale kerdyiline, ke pa mande shaj grizhon tumen. Vi anglunes grizhosardinesas tumen pa mande, ba nas tumen shajipe pe leste.
Na o chorripe phenavel manca kado, ke aba sityilom kodo, ke dosta te avel mange kodo, so si man.
Zhanav vi kethane te cirdav man, ba vi avri te uchuvav: sako thaneste sakofalo siklom: zhanav vi te chajuvav, vi te bokhajvav, mishto te trajisarav haj vi chorrivanes.
Sakofalo zhanav te kerav ande kodo, kon man zor del.
Ba vi kade mishto kerdine, ke mure amala kerdyiline ande muro chorripe.
Vi tume zhanen, filippicka, ke kana anglunes viacaros o evangeliumo, kana anda Makedonia dromardemtar, chi jekh eklezhia chi las opre manca o kontakto, numa korkori tume.
Inke aba vi ande Tessaloniki bishaldine unyivar variso pe muro zhutipe.
Na anda kodo, sar pe varisoko dimatipe te dorosaros, ba anda kodo, ke kodalesko frukto dorosarav, so butindes iskirina pe tumari rig.
Perdal lom sakofalo haj mishto trajiv: sakofalo si man, kathar kodi vrama kana perdal lom kathar o Epaforoditos so bishaldine, sar lashi sung, skunpo haj Devleske fajlimo sarkafimo.
Muro Del andre pherdyarela tumaro sako trubujipe kathar pesko barvalipe luvudyipesa ando Kristo Jezush.
Le Devleske haj amare Dadeske luvudyipe sagutno-sagutnes! Amen.
Drobovjisaren sakone suntones ando Kristo Jezush. Le phral, kon manca si, drobovjisaren tumen.
Le suntora, majfeder anda kodal, kon anda chasaresko kher sile drobovjisaren tumen.
Le Raj Jezush Kristoski gracija te avel tumare duhosa! Amen.