yo’aneS nav QIn wa’DIch

Chapters:

1 2 3 4 5

verse #1

numuSHa'qu' vav'a' 'e' yIqel. maHvaD joH'a' puqpu' nuDam. 'ej teH; puqpu'Daj maH. meqvammo', nuSovbe' qo'. ghaH Sovbe' 'oH.

verse #2

juppu'wI', DaH joH'a' puqpu' maH. tuch nuq wImoj? wej maHvaD De'vam 'otHa'lu'. narghta' QIStoS, ghaH wIrur 'e' wISov, ghaH wIleghchu'mo'.

verse #3

'ej ghu'vam tulchugh vay', vaj vay'vetlh watlhmoH QIStoS 'ej ghaH rur.

verse #4

bIv Hoch yemwI'; vabDot yemlu'DI', chut lajlu'Qo'.

verse #5

'ej yemmey nge'meH narghta' ghaH 'e' boSovaj. 'ej ghaHDaq pagh yem tu'lu'.

verse #6

ghaH tlhejlu'chugh, yemlu'Qo'. yemlu'taH, not ghaH leghlu' 'ej not ghaH Sovlu'.

verse #7

puqpu' mach, boyuqlu' 'e' yIchaw'Qo'. batlh vangchugh vay', quv vay'vetlh; QIStoS rur.

verse #8

batlhHa' vangchugh vay', mIghwI' ghaH vay'vetlh'e'. bI'reS yemchoH mIghwI'. meqvetlhmo', mIghwI' ta'mey Qaw'meH narghta' joH'a' puqloD.

verse #9

yemtaHQo' nuv boghmoHta'bogh joH'a', ghaHDaq ratlhtaHmo' joH'a' raS'IS 'ej yemlaHbe', ghaH boghmoHta'mo' joH'a'.

verse #10

meqmeyvammo', joH'a' puqpu', mIghwI' puqpu' je DIngu'laH: quvHa'chugh vay', joH'a' puq ghaHbe'. 'ej vInDa'Daj muSHa'be'chugh, joH'a' puq ghaHbe'.

verse #11

taghDI' Hoch, QInvam'e' wIQoy: mamuSHa'chuqjaj

verse #12

qa'yIn yIDaQo'; mIghwI' toy' 'ej loDnI'Daj tlhIn chotta'. 'ej qatlh loDnI'Daj tlhIn HoHta'? HoHta', quvHa'mo' ghaH 'ej quvmo' loDnI'Daj.

verse #13

peyay'Qo', vInDa'pu'wI', lImuSchugh qo'.

verse #14

Heghvo' yIn wIjaHta' maSaHchuqchu'mo' 'e' wISov. HeghDaq ratlh muSHa'Qo'wI'.

verse #15

vInDa'Daj muSchugh vay', chotwI' ghaH 'ej pagh chotwI'Daq ru'Ha'chu'bogh yIn tu'lu' 'e' boSov.

verse #16

meqvammo', muSHa'meH mIw wISov: maHvaD nob'eghta' yeSu'a QIStoS. maH'e', vInDa'ma'vaD manob'eghnIS.

verse #17

'ach qo' jo ghajchugh vay' 'ej 'utwI' Hutlh vInDa'Daj 'e' legh vay'vetlh 'ej HutlhwI' vupQo' vay'vetlh, vay'vetlhDaq joH'a' muSHa'qangchu'ghach?

verse #18

puqpu' mach, maSaHchu'jaj. mamuSHa'meH mu'mey, jatDu' je DIlo'be'jaj. mamuSHa' 'e' lu'aghjaj ta'meymaj, vIt je.

verse #19

vIt 'oH mungmaj'e' 'ej ghaH tlhopDaq mabaw'laH 'e' wISov, meqvammo':

verse #20

nuqIchchugh tIqDu'maj, joH'a' HoSghaj law' tIqDu'maj HoSghaj puS 'e' wISov 'ej Hoch Sov ghaH.

verse #21

juppu'wI', nuqIchbe'chugh tIqDu'maj, joH'a' tlhopDaq mabaw'

verse #22

'ej ghaHvo' Hoch wIpoQbogh wIHev, chutDaj DIpabtaHmo' 'ej wIbelmoHmeH mavang.

verse #23

'ej puqloDDaj pong, yeSu'a QIStoS, wIvoq 'ej maSaHchuqchu' 'e' ra' ghaH.

verse #24

'ej ghaHDaq ratlh chutDaj pabwI', 'ej chutDaj pabwI'Daq ratlh joH'a'. 'ej nutlhej 'e' wISov qa''a'mo' nunobta'bogh.

Chapters:

1 2 3 4 5