capitolul 23
O Pal karing o angsvato boldaspe, haj kade das duma: „Murshale, phralale! Zhikaj kado dyes intregone lashe duhoske hatyarimatasa phirdom angla o Raj.”
O Ananiash angrashaj vladisardas kodaleske, kon pasha leste tordyolas, ke te malaven les pa muj.
O Pal atunchi kade das leste duma: „Marel tut o Del, tu po parnyipe makhlo zido! Tele beshes, ke kathar e kris te krisares man, haj la krisa avri bodines, vladipe phenes, ke te malaven man!”
Kon kothe tordyonas kodo phendine: „Le Devleske ang- rashajes kushes?”
Ba o Pal kade das duma: „Chi zhanos phralale, ke voj si o ang- rashaj. Ke vi tele si iskirime: »Na de armaja tye populareske rajes!« „
Apol o Pal zhanelas, ke le svatosko jekh rig mashkar le sadducanaj, le majbut pale mashkar le farizana sile, oprecipisardas ando angsvato: „Murshale, phralale! Farizano som, haj farizanengo shavo! Anda spereantipe haj anda mulengo opretrajisaripe tordyuvav angla e kris”
Kana avriphendas kado, xape kerdyilas mashkar le farizana haj sadducana, haj o butipe shindyilastar jekhavrestar.
Ke le sadducana kodo phenen, ke naj opretrajisaripe, chi andyelo, chi duho: le farizana pale soldujen patyan.
Kerdyilas apol pe kado baro xape. Ke mashkar le farizana unyizhene opretordyiline, haj tromanes avri phendine: „Khanchi nasul chi arakhas ande kado manush! Shajke duho bake andyelo das leste duma.”
Ba ke o xape turbato kerdyilas, o mijari kathar kodo daralas, ke mudaren le Pales. Avri das apol o vladipe, ke le ketani te aven tele, te len les avri mashkar lende, haj te ingren les ando dyiz.
Pe kaver ratyi pale tordyilas pasha leste o Raj, haj kodo phendas leske: „Av zuralo, ke sar chacharipe kerdan pa mande ando Jeruzhalemo, kade trubul vi ande Roma chacharipe te keres.”
Kana zorisardas, mashkar le bibolde unyizhene kethane xutyildine, haj colaxardine. Kodo phendine, ke china chi xan, haj china chi pen, zhikaj le Pales chi mudaren.
Vi kathar le shtarvardesh zhene majbut sas le mursh, kon kade kethane colaxrdine.
Gelinetar kaj le angrashaja haj kaj le phure, haj kodo phendine lenge: „Colaxardam amen, ke zhikaj kodo khanchi chi xasa, zhikaj le Pales chi mudaras.
Akanak apol phenaven andre le mijareske le angsvatosa kethane, ke te anavel les angla amende, sar variso majbut te kamenas avri te zhanen pa leste: ame pale gata tordyuvas, ke zhiso kathe te reselas, te mudaras les.”
Ba le Paleske phenyako shavo ashundas pa kadi traba. Kothe gelas apol, andre gelas ando dyiz, haj avrizhanardas kado le Palesa.
O Pal pale peste akharadas jekhes mashkar le shelara, haj kodo phendas leske: „Inger kadale ternes kaj o mijari, ke si variso, so avri kamel te phenel leske!”
Kodo pasha peste lasles, ingerdas les kaj o mijari, haj kade das duma: „O phanglo Pal manglas man, ke te anav tute kadale ternes, ke variso kamel te phenel tuke.”
O mijari xutyildas lesko vast, rigate gelas lesa, haj pushlas les: „So kames mange te phenes?”
Kodo pale phendasles: „Le bibolde jekh hatyardine ande kodo, ke mangen tut, ke te ingres le Pales tehara angla angsvato, sar variso te kamenas inke avri te zhanen pa leste.
Ba tu na patya lenge, ke mashkar lende majbut sar shtarvardesh zhene zhukaren pe leste chordanes: ke kadal colaxardine pe pende, ke china chi xan, haj china chi pen, zhikaj chi mudaren les. Vi gata tordyon aba, haj zhukaren tyi vorba.”
O mijari pe kado bishaldas le ternes, haj vladisardas leske, ke tena phenel avri khanyikaske, ke „kadal avri phendan mange”.
Pala kodo akharadas duje shelaren, haj kodo phendas lenge: „Ratyaki vrama kathar le trin chasura inkren gata eftavardeshe manushen grastenca kethanes haj dujshela brancharen, ke ande Cezaria te zhan.
Lasharen angle vi dumarde pedon”, ke le Pales opre te beshaven, haj bi bidako te ingren les kaj o Felix prefekto.
Pala kodo lil iskirisardas. Kado sas ande leste:
„Le Klaudius Lizias Felixeske, le bare thaninkrareske. Drobovjipe tuke!
Le bibolde xutyildine kadale manushes, haj kamline te mudaren les, kana le ketanenca mashkaral ushtyadom haj avrimuntusardom les, ke avrizhanglom, ke romaickoj.
Kodo gindipesa, ke avri te zhanav e dosh, so pe leste phenenas, andre ingerdom les ande lengo angsvato.
Kade dikhlom, ke anda penge krisange kasave butya dosharen les ande soste chi von chi hatyaren jekh, ba les khanchi bezex najles, anda soste meripe bake sastra perelaspe leske.
Apol ke vi kodo avriphendine mange, ke konshpiralin pe leste, bishaldom les tute, haj vi kodalenge phendom, kon dosharen les, ke tute te zhan. Lasho sastyipe!”
Le ketani pale sar vladisardine lenge, pende line le Pales, haj tala ratyaki vrama ingerdine les ando Antipatriso.
Kaver dyes le grastaren dromardine, ke majdur te zhantar lesa, von pale palpale geline ando dyiz.
Kodal pale kana resline ande Cezaria, perdal dine o lil le prefektoske, haj vi le Pales angla leste tordyardine.
Kana ginadas o lil, pushlas les, ke anda savi provincia avilas. Kana avrizhanglas, ke cicilickoj,
kodo phendas: „Maj avri ashunav tut, kana vi tye doshara avenatar.” Palunes vladisardas, ke te len pe leste sama ande Herodeshesko kher.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly