capitolul 11
Sas jekh Lazar anavesko nasvalo ande Betania, la Marijake haj laka phenyako, ande Martako gav.
E Marija sas kodi kon makhlas le Rajes makhlimasa, haj leske punre peske balenca khoselas. Lako phral o Lazar sas nasvalo.
Le phenya vorba bishalde pala leste: „Raja, aketa, kas kames nasvaloj.”
Kana o Jezush ashundas kado kade das duma: „Kado nasvalipe chi resel pe lesko meripe, ba pel Devlesko luvudyipe, te luvudyilpe perdal pa leste le Devlesko Shavo.”
O Jezush kamelas la Marta, haj laka phenya, haj le Lazares.
Kana apol ashundas, ke nasvaloj, inke duj dyes pe kodo than ashilas kaj sas,
pala kodo kade das duma kaj le sityarde: „Zhastar pale ande Judea.”
Le sityarde kodo phendine leske: „Rabbi, akanak kamline le bibolde te shuden tut barrenca, haj pale kothe zhas?”
O Jezush kodo phendas: „Na deshuduj chasura si le dyeses? Kon dyese phirel chi pereltar, ke dikhel kadala lumake fimlalimata.
Kon pale ratyi phirel, pereltar, ke naj ande leste fimlalipe.«
Kado phendas, pala kodo kade das lende duma: „Amaro vortako, o Lazar sutastar, ba zhavtar te ushtyavav les anda suno.”
Le sityarde pe kado kodo phendine: „Raja, te sovel atunchi sastyola.”
Ba o Jezush pa lesko meripe vorbilas, kodal pale kodo gindisardine, ke pa pachako hodinipe vorbisarel.
Anda kado o Jezush uzhes avri phendas lenge: „O Lazar mulas,
haj losshav anda tumende, ke chi somas kothe, ke maj te patyan. Ba zhas leste!”
O Tamash, kas Ikereske anavaren, kade das duma kaj le majbut sityarde: „Aventar vi ame, haj meras lesa kethane!”
Kana o Jezush reslas, o Lazar aba shtar dyes ando murmunto sas.
E Betania pale na dur sas kathar o Jeruzhalemo, karing le deshupanzh shtadiumura.
Anda kado mashkar le bibolde but zhene gelinetar kaj e Marta haj e Marija, te ushoren lengi briga anda lengo phral.
E Marta kana ashundas, ke o Jezush avel, angla leste gelas, e Marija pale khere ashilas.
E Marta atunchi kade das duma kaj o Jezush: „Raja, kathe te avilanas, chi mulino muro phral.
Ba vi akanak zhanav, ke zhiso manges kathar o Del, o Del delles tuke.”
O Jezush kodo phendas lake: „Tyo phral opretrajila.”
E Marta kade das duma leste: „Zhanav, ke opretrajisarla kana avla o opretrajisaripe, po paluno dyes.”
O Jezush kodo phendas lake: „Me som o opretrajisaripe haj o trajo. Kon patyal ande mande, vi te mulas, trajila,
haj sa kodo, kon trajil haj patyal ande mande, chi merel chikana. Patyas kado?”
E Marta kodo phendas leske: „Ova, Raja, patyav, ke tu san o Kristo, le Devlesko Shavo, kon ande luma avel.”
Palasoste kado phendas, gelastar haj akhardas peska phenya, la Marija, haj koles kodo phendas lake: „O Maistrovo kathej haj akharel tut.”
Kana kodi ashundas kado, sigo opreushtyilas, haj leste sidyardas.
Apol o Jezush inke chi reslas ando gav, ke pe kodo than sas, kaj e Marta angla leste gelas.
Le bibolde pale, kon lasa sas ando kher haj ushorenas laki briga, kana dikhline, ke e Marija sigo opreushtyilas haj avrigelas, pala late geline, ke kodo gindisardine: „Kaj o murmunto zhal, kothe te rovel.”
Kana e Marija kothe reslas kaj o Jezush sas, haj dikhlas les, kaj leske punre burdosardas, haj kodo phendas leske: „Raja, kathe te avilanas, chi mulino moro phral.”
O Jezush pale, ke dikhlas, ke rovel, haj vi kodal bibolde roven, kon lasa aviline, zhi anda o duho sunusardas len.
Pushlas: „Kaj shutine les?” Kodo phendine leske: „Raja, av haj dikh!”
O Jezush asvarelas.
Pe kado le bibolde kodo phendine: „Aketa, sar kamelas les!”
Ba sas mashkar lende, kon kade vorbinas: „Voj, kon opreputerdas le korreske jakha, nashtig kerdinosas, ke kado tena merel?”
O Jezush ande pesko dyi inke vi akanak mila hatyardines kaj o murmunto gelas. Jeka caverna sas kodo, so jekhe barresa sas andre sharado.
O Jezush kade das duma: „Len kothar o barr!” E Marta, le muleski pheny, kodo phendas leske: „Raja, aba sung siles, ke aba shtarto dyesengoj!”
O Jezush kodo phendas lake: „Na kodo phendom tuke, ke te patyas, dikhesa le Devlesko luvudyipe?”
O barr apol line kothar, o Jezush pale oprevazdas peske jakha, haj kade das duma: „Raja, najisij tuke, ke ashundan man.
Apol me zhanos, ke sagutnes ashunes man, numa anda krujal tordyiline manusha phendom, ke te patyan, ke tu bishaldan man.”
Pala soste kadal phendas, glasunes kado cipisardas: „Lazar, av avri!”
Haj kodo, kon mulo sas, avri avilas. Leske punre haj vast andre sas patyarde, haj pe leski mosura dikhlo sas. O Jezush kodo phendas lenge: „Putren les avri, haj muken les te zhaltar!”
But zhene mashkar le bibolde, kon kaj e Marija haj kaj e Marta aviline, haj dikhline, so kerdas, patyanas ande leste.
Ba unyizhene mashkar lende gelinetar kaj le farizana, haj phendine lenge, ke so kerdas.
Pe kado le angrashaja haj le farizana kethane akhardine le angsvatos, haj kodo phendine: „So te keras? Ke kado manush but chudicka somnura kerel.
Te mukasa kado leske, savorazhene patyana ande leste. Atunchi avenatar le romaicka, haj lena amendar amare phuva haj amare popularon.”
Mashkar lende jekh, o Kaifash, kon ande kodo bersh angrashaj sas, kodo phendas lenge: „Tume chi zhanen khanchi,
haj chi pe kodo chi gindin, ke maj mishtoj tumenge, kana jekh manush merel anda popularo, sar kana o intrego them xasajvelatar!”
Kado pale na pestar phendas, ba sar angrashaj ande kodo bersh profecisardas, ke o Jezush merela anda popularo,
haj na feri anda popularo, ba vi anda kodo, ke kethane te kidel le Devleske ande luma rispisarde shavoren.
Kathar kodo dyes apol kethane vorbisardine, ke mudaren les.
Anda kado o Jezush chi phirelas mashkar le bibolde sakonestar pinzhardes. Gelastar kothar kaj pe kodo than, so pasha e pusta sas, haj kodole foros Efraimeske anavarenas, haj vi kothe ashilas peske sityardenca kethanes.
Pashe sas le biboldengi Paska, haj pa gava but zhene geline opre ando Jeruzhalemo angla e Patradyi, te suntosaren pen.
Rodenas le Jezushes, haj ande khangeri kodo phenenas jekhavreske: „So gindin? Dore, avelatar pe baredyesa?”
Le angrashaja haj le farizana vladipe dine avri, ke kana varikon avrizhanela, ke kaj si, te del les andre, haj xutyilena les.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly